Зборник на Миладиновци/ Сирма војводка

Сирма војводка

од Браќа Миладиновци

на современ македонски правопис

Дека се чуло видело,
Мома Војвода да бидит,
На седамдесет сејмени
На тија гори зелени,
На тија води студени?
Мома им веле говоре:
„Това сос људба не биват,
Това сос срдба не биват!
Земајте прстен от р'ка,
Врзејте прстен на бука,
Фрлејте редом на нишан;
Кој ке ударит прстенот,
Тој ке си бидет Војвода
И мене ке ме кердосат.”
Сите фрљаа со редом,
Никој ми прстен не удри.
Мома си веле, говоре:
„Подај ми, чауш, пушката!”
Пушката пукна от р'ка,
Падна ми прстен от бука,
Пак мома веле, говоре:
„Земајте камен фрлејте,
Кој ке ме мене натфрлит,
Тој мене нека кердосат,
Тој млад Војвода да бидет.”
Сите ми се редом фрљаа,
Никој се камен не натфрли;
Сирма ми камен натфрли
Десет чекори потамо;
И седамдесет дружина
Одбраа Сирма Војвода.