Глава 1

Авторство и поздрави

¹Од старешината Јован, до мојот драг пријател Гај, кого искрено го сакам.

²Драги пријателе, ти посакувам сѐ добро да ти оди, да бидеш телесно здрав, како што си духовно јак.

³Многу се израдував кога некои од христијаните дојдоа кај мене и ми потврдија дека ти си на страната на вистината и чекориш по вистинскиот пат. ⁴За мене нема поголема радост од тоа да слушнам дека моите деца чекорат по вистинскиот пат.

За помагањето меѓу христијаните.

⁵Драги пријателе, добро правиш што се грижиш и за други христијани, особено за дојдените од други места. ⁶Тие пред сите нас во црквата раскажаа за твојата љубов. Добро ќе сториш ако ги испратиш на начин како што прилега пред Бог, ⁷бидејќи тие патуваат заради Исусовото име, а не примаат никаква помош од оние што не се христијани. ⁸Заради тоа треба да покажеме гостопримство спрема такви луѓе, за и ние да земеме учество во ширењето на вистината.

Осуда на Диотреф

⁹Јас им напишав едно кратко писмо на луѓето во црквата, но Диотреф, кој сака да биде водач меѓу нив, не нѐ признава нас. ¹⁰Затоа, ако дојдам, ќе го прекорам за тоа што го прави, напаѓајќи нѐ злобно и неправедно. И тоа не му е доволно, па не само што самиот не ги прифаќа христијаните што доаѓаат во посета, туку и оние што би сакале да ги прифатат ги спречува и ги исклучува од црквата!

¹¹Драги пријателе, немој да земаш пример од оние што прават зло! Угледај се на оние што прават добро! Оној што прави добро е Божјо дете, а оној што прави зло, покажува дека не Го познава Бога.

Признание за Димитри

¹²За Димитри сите зборуваат добро. Тоа се потврдува со вистинската порака што тој ја проповеда. И ние имаме добро мислење за него, а ти знаеш дека ние сме искрени.

Поздрави

¹³Сакам уште многу нешта да ти кажам, но не сакам вака со перо и мастило. ¹⁴Се надевам дека наскоро ќе те видам и лице в лице ќе си поразговараме.

¹⁵Божјиот мир нека биде со тебе!
Те поздравуваат пријателите. Поздрави ги и ти оние што ни се пријатели, секого поименично.