Глава 1

Авторство и поздрави

¹Од Павле, Силван и Тимотеј
до членовите на црквата во Солун, до оние што Му припаѓаат на Бог Таткото, и на Господ Исус Христос.
Бог нека ви биде благонаклонет и нека ви даде мир.

Примерната вера на солунските христијани

²Постојано Му заблагодаруваме на Бог за сите вас и секогаш ве спомнуваме во нашите молитви. ³Си спомнуваме пред Бог, нашиот Татко, како се покажа вашата вера на дело, како работите со љубов и колку трпеливо се надевате на нашиот Господ Исус Христос.

⁴Знаеме, драги пријатели, дека Бог вас ве сака и дека ве одбра да бидете Негов народ, ⁵затоа што Радосната вест не ви ја проповедавме само преку зборови, туку бевте сведоци на огромна сила: Светиот Дух наполно ве увери дека тоа што ви го говоревме е вистина. Вие знаете како ние живеевме додека бевме кај вас. Тоа беше дополнителен доказ дека нашата порака е искрена. ⁶Вие сега се однесувате онака како што се однесуваме ние и како што се однесува Господ, па, иако многу настрадавте, со радост ја прифативте пораката што доаѓа од Светиот Дух.

⁷Така им станавте пример на сите христијани во Македонија и Ахаја. ⁸Не само што од вас почна да се шири пораката Господова во Македонија и Ахаја, туку за вашата вера насекаде се раскажува! Нема никаква потреба ние за тоа да зборуваме. ⁹Самите луѓе раскажуваат за вас, како сте ги пречекале, како сте се обратиле кон Бог и сте престанале да им служите на идолите, за да Му служите на вистинскиот, на живиот Бог; ¹⁰и како го чекате Неговиот Син Исус да дојде од небото. Него Бог Го воскресна од мртвите и Тој нѐ избави од Божјиот гнев што ќе дојде.

Глава 2

Мисијата на Павле во Солун

¹Вие, драги мои, знаете дека нашето доаѓање кај вас не беше загубено време. ²Знаете како настрадавме и како нѐ навредуваа во градот Филипи, пред да дојдеме кај вас. Сепак, Бог ни даде храброст, наспроти силното противење, и вам да ви ја пренесеме Неговата Радосна вест. ³Тоа што ви го проповедавме не произлегува од заблуда, ниту пак е со нечисти мотиви, или со измами.

⁴Зборуваме онака како што Бог бара од нас, зашто Тој нѐ провери и утврди дека може да ни го довери проповедањето на Радосната вест. Затоа ние зборуваме, не со намера да им угодуваме на луѓето, туку да Му угодиме на Бог, на Оној што ги проверува мотивите на нашите срца. ⁵Добро знаете дека ние не се обидовме да ве придобиеме со подмилкување. Бог ни е сведок дека не дојдовме кај вас со подмолна алчност за богатење. ⁶Не бараме ни признание од луѓето: ниту од вас, ниту од други луѓе. ⁷Како апостоли на Христос можевме да ви поставуваме разни барања, но ние многу внимателно се однесувавме со вас, како мајка доилка што со нежност се грижи за своите дечиња. ⁸Толку ни станавте мили, толку се приврзавме спрема вас, што бевме решени не само да ви ја пренесеме Божјата Радосна вест, туку и душите свои да ги дадеме за вас.

⁹Впрочем, драги пријатели, потсетете се како ние работевме и се трудевме. Ден и ноќ работевме за својата издршка, за да не му бидеме на товар на никого од вас додека ви ја проповедавме Божјата Радосна вест.

¹⁰Вие и Бог сте ни сведоци дека нашето поведение спрема вас христијаните беше искрено, праведно и беспрекорно. ¹¹Знаете дека спрема секого од вас се однесувавме онака како што татко се однесува спрема своите деца. ¹²Ве охрабрувавме, ве утешувавме и ве поттикнувавме да живеете онака како што прилега за Бог, Кој ве повикува да станете дел од Неговото царство и да учествувате во Неговата слава.

¹³Постои и друга причина поради која ние постојано Му заблагодаруваме на Бог. Кога ја слушнавте од нас Божјата порака, вие ја прифативте не како порака што доаѓа од луѓе, туку како Божја порака, што таа навистина и е. Таа сега дејствува во вас кои поверувавте. ¹⁴Драги пријатели христијани, вам ви се случија истите нешта што им се случуваат на Божјите цркви во Јудеја и на сите луѓе што Му се верни на Исус Христос. Вие настрадавте од вашите сонародници, исто како што тие страдаа од Евреите, ¹⁵од оние што Го убија Господ Исус, што ги убиваа пророците, од оние што и нас жестоко нѐ прогонуваа. Тие не Му се по волја на Бог. Непријателски се расположени спрема целото човештво. ¹⁶Ни забрануваа да им проповедаме на луѓе што не се Евреи, за да не се спаси и некој што не е Евреин! Со тоа докрај се исполни списокот на нивните гревови. Сега Божјиот гнев конечно дојде и на нивна глава.

Павле сака повторно да ја посети црквата во Солун

¹⁷Драги пријатели! Колку многу ни недостасувате, колку желно сакаме пак да ги видиме вашите лица, иако само кратко време сме одвоени од вас, се разбира физички, но не и во нашите мисли. ¹⁸Сакавме да дојдеме кај вас. Јас, Павле, не еднаш се обидов, но сатаната нѐ спречи. ¹⁹Конечно, што ни дава надеж и радост, со каков венец ние ќе се гордееме? Тоа сте вие! Кога нашиот Господ Исус повторно ќе дојде, ние со вас ќе се гордееме и ќе се радуваме. ²⁰Вие сте нашата слава и радост.

Глава 3

¹Веќе не можевме да издржиме. Решивме само ние да останеме во Атина, ²а кај вас да го пратиме нашиот брат Тимотеј. Тој работи со нас за Бог и ни помага во проповедањето на Радосната вест за Христос. Сакавме тој да ве охрабри и да ја зацврсти вашата вера. ³Не сакаме никој од вас да се обесхрабри од овие тешкотии. Однапред знаевте дека ќе треба да страдаме. ⁴Кога бевме кај вас, ви кажувавме дека ќе минуваме низ неволи. Така и се случи. ⁵Затоа јас не можев да чекам повеќе и го испратив Тимотеј да види како се држите, во каква состојба е вашата вера. Страхував сатаната да не успеал да ве поколеба преку искушенија и да го уништи сето она што ние го постигнавме.

⁶Сега Тимотеј се врати од кај вас и ни донесе радосни вести. Ни раскажа дека во вас има и вера и љубов. Ни пренесе дека со радост се сеќавате на нас, и дека и вие копнеете пак да нѐ видите.

⁷Така, драги пријатели, и покрај сите маки и страдања низ кои минуваме, вашата вера многу нѐ охрабри. ⁸Вашата непоколеблива вера во Господ претставува силен поттик^[1] за нас. ⁹Како да Му се заблагодариме на Бог за вас? Како да Му возвратиме за сета радост што ни ја причинувате? ¹⁰Деноноќно, од сѐ срце Му се молиме на Бог пак да се сретнеме со вас и да ви помогнеме онаму каде што имате потреба во однос на вашата вера.

¹¹Се молиме Бог, нашиот Татко, и Господ Исус Христос, да ни дозволат пак да дојдеме кај вас. ¹²Господ нека ја поттикне љубовта што ја имате еден спрема друг и спрема сите луѓе. Таа љубов нека расте онака како што расте нашата љубов спрема вас. ¹³А кога нашиот Господ Исус ќе дојде, заедно со сите Негови следбеници, нека ги направи вашите срца чисти и посветени во очите на Бог, нашиот Татко. Амин.

Глава 4

Поттик на богоугоден живот

¹За крај, драги пријатели, сега кога Му припаѓате на Господ Исус, ве молиме и ве повикуваме да живеете богоугодно, онака како што ве учевме. Вие веќе сега живеете така, но трудете се уште повеќе. ²Потсетувајте се на упатствата што ви ги дававме како на следбеници на Господ Исус. ³Бог сака вие да бидете свети - да се чувате од блуд. ⁴Секој треба да умее да го контролира своето тело^[2], за да биде свето и за почит. ⁵Немојте да им робувате на вашите необуздани страсти, како што прават луѓето што не Го познаваат Бога.

⁶Во однос на ова прашање, никако не смеете да мамите и искористувате други христијани! Потсетете се, веќе ве предупредивме дека Господ ќе го казни секој што така прави. ⁷Бог не ве одбра за да живеете валкан живот, туку за да бидете свети. ⁸Секој што не се придржува кон ова, не е непослушен спрема нас, туку спрема Бог, спрема Оној што ни Го дава Својот Свет Дух.

⁹Нема потреба да ви пишувам дека треба да се сакате еден со друг. Самиот Бог веќе ве научи како да се сакате, ¹⁰и вие веќе ја покажавте својата љубов спрема сите христијани во цела Македонија. Сакам само да ве охрабрам, драги пријатели, таа љубов кај вас уште повеќе да расте. ¹¹Трудете се да живеете тивко, да си ја гледате својата работа, да си заработувате за живејачка, како што и ве учевме. ¹²Така и тие што не се христијани ќе ве почитуваат, а вие нема да зависите од никого.

Воскреснување и вознесување на христијаните

¹³Драги пријатели христијани, сакаме да знаете што ќе се случи со оние што се починати, за да не тагувате како луѓето што по ова прашање немаат никаква надеж. ¹⁴Ако ние веруваме дека Исус умре и воскресна, веруваме и дека Бог пак ќе ни Го врати, а со Него ќе ги врати и сите што пред да починат верувале во Исус.

¹⁵Ова ни е кажано од Господ. Тој ни рече дека ние што ќе бидеме живи кога Тој повторно ќе дојде, ќе се сретнеме со Него откако Тој претходно ќе ги воскресне починатите.

¹⁶Господ Лично ќе се симне од небото, со силен глас ќе заповеда, со глас на архангел и со труба Божја, и прво ќе воскреснат оние што верувале во Христос пред да починат; ¹⁷потоа ние што сме живи, заедно со нив, ќе бидеме грабнати во облаците, за да се сретнеме со Господ и засекогаш да останеме со Него. ¹⁸Затоа, утешувајте се и охрабрувајте се меѓусебно со овие зборови.

Глава 5

¹Нема потреба да ви пишувам за времето и датумот кога ќе се случи ова. ²Вие сигурно и самите знаете дека доаѓањето на Господ ќе биде ненадејно, како кога крадец неочекувано упаѓа ноќе. ³Кога луѓето ќе си мислат: „Сега сме мирни и безбедни,“ тогаш неочекувано ќе им дојде уништувањето, како кога породилни болки ѝ доаѓаат на жена што треба да роди. Тоа неминовно ќе им се случи.

⁴Но вие што сте христијани, не живеете во мрак, па во тој ден нема да бидете непријатно изненадени, како од крадец. ⁵Вие ѝ припаѓате на светлината и на денот, а не на темнината и на ноќта. ⁶Затоа, да нѐ бидеме заспани, како другите луѓе, туку да бидеме будни и трезвени. ⁷Ноќе луѓето спијат, ноќе се опиваат; ⁸но ние што му припаѓаме на денот треба да бидеме трезвени. Треба да се вооружиме со вера и љубов. Тие да ни бидат како штитник на градите. Треба да се вооружиме со увереност дека ќе бидеме спасени и тоа да ни биде како шлем на главата.

⁹Бог не нѐ одбра за да нѐ казни, туку за да бидеме спасени преку нашиот Господ Исус Христос, ¹⁰Кој умре за нас, за да Му се придружиме и вечно да живееме со Него, без оглед на тоа дали кога Тој ќе се врати ќе бидеме живи, или починати. ¹¹Затоа, продолжете да се охрабрувате и да се изградувате еден со друг.

Упатства за меѓусебните односи во Црквата

¹²Драги христијани по црквите, ве молиме да им оддавате признание на оние што работат меѓу вас, што ве водат и поучуваат; ¹³искрено да ги почитувате и да ги сакате заради тоа што го работат. Ве молиме да не се карате.

¹⁴Опоменувајте ги мрзливите, охрабрувајте ги малодушните, помагајте им на слабите и имајте трпение со сите.

¹⁵Гледајте никој никому да не враќа зло за зло. Напротив, однесувајте се добро еден спрема друг и спрема сите луѓе.

¹⁶Бидете секогаш радосни, ¹⁷постојано молете се. ¹⁸Што и да ви се случува, прифаќајте го со благодарност, зашто така, вие што Му припаѓате на Исус Христос, ја исполнувате Божјата волја.

¹⁹Немојте да го задушувате дејствувањето на Светиот Дух. ²⁰Немојте да ги занемарувате пророштвата. ²¹Проверувајте сѐ што се проповеда и држете се до тоа што е добро. ²²Држете се настрана од сѐ што е зло.

Благослови и поздрави

²³Самиот Бог, Кој е извор на мир, нека ве направи целосно свети и нека го зачува чисто целото ваше битие: духот, душата и телото, сѐ до повторното доаѓање на нашиот Господ Исус Христос. ²⁴На Оној што ве одбра, можете да Му верувате. Тој навистина ќе го стори тоа.

²⁵Драги пријатели христијани, молете се и за нас.

²⁶Поздравете се меѓусебно со свет бакнеж.

²⁷Ве задолжувам, во името на Господ, да го прочитате ова писмо пред сите христијани.

²⁸Нашиот Господ Исус Христос нека ви биде благонаклонет.

Забелешки:

↑ Или: ни дава нов живот, нѐ живнува.
↑ Буквално: својот сад. Може да се мисли и на брачниот другар.

[1] Или: ни дава нов живот, нѐ живнува.

[2] Буквално: својот сад. Може да се мисли и на брачниот другар.

[1]

[2]