Бели Мугри/ Селска мака

Од Wikisource
Прејди на прегледникот Прејди на пребарувањето

„Печал“ „Селска мака“

од Коста Солев Рацин
„Тутуноберачите“
Препис во оригинал како што е издадена во збирката песни „Бели Мугри.

Покрај ниви, покрај лаки,
покрај снискине брегови,
вода тече — вода влече
селски слзи, селски маки
селски таги и јадови.

Извор вода извираше
плодно поле наливаше —
плодно поле род народи.

Ноќе чума ли одеше
плод от поле ли береше —
амбар селски пуст остана!

Слнце светло ми светеше
гора ми се зеленеше —
в гора пиле песна пее.

Камен ли му в гради легна
стија ли го в коси стегна —
срце селско – векот тажно!

Кој ја сипе, кој ја роси
таја слана што покоси
по нивјето пшениците
по лозјето гроздовите?
Та се житце не зелени
та се грозје не румени,
та от пуста селска мака
аир нема дур от века?


Поврзано


PD-icon.svg Сите дела од овој автор се во јавна сопственост во целиот свет бидејќи авторот е починат пред повеќе од 50 години.