Хошеа (вики-превод)

Даниел

Хошеа Библија (вики-превод) од н.п.

Јоел

Глава 1

¹Збор од ГОСПОД што дојде за Хошеа^[1], син на Беери, во деновите на Јудејските цареви Уззија^[2], Јотам, Ахаз и Езекија, и во деновите на Израелскиот цар Јеровоам^[3], синот на Јоаш.

Жената и децата на Хошеа.

²Почна да зборува ГОСПОД преку Хошеа и му рече ГОСПОД на Осија: „Оди, земи си жена блудница и деца од неверство, зашто за блуд, за блуд е виновна земјата и од ГОСПОД застранува.“ ³Па отиде тој и се ожени со Гомер, ќерка на Дивлаим. Зачна таа и му^[4] роди син.

⁴Тогаш му рече ГОСПОД: „Дај му име Језреел^[5], зашто брзо ќе го казнам домот на Јеху^[6] за крвопролевањето во Језреел и ќе му ставам крај на царството на домот Израелев. ⁵Во тој ден ќе го скршам лакот^[7] на Израел во долината Језреел.“

⁶Зачнаа таа повторно и роди ќерка. Тогаш му рече ГОСПОД: „Дај ѝ име Ло Рухама^[8], зашто нема веќе да го сакам домот Израелев, ќе го заборавам, сосема ќе го заборавам. ⁷А домот Јудин ќе го сакам и ќе го спасам^[9], но не со лак, ни со меч, ни со битка, ни со коњи, ни со коњаници, туку преку ГОСПОД, нивниот Бог.“

⁸Откако ја одби Ло Рухама, зачна и роди син. ⁹Тогаш ГОСПОД рече: „Дај му име Ло Ами^[10], зашто вие не сте мој народ и Јас не сум ваш Бог.“

¹⁰Сепак, бројот на децата Израелеви ќе биде како морската песок, која не може ниту да се измери, ниту да се изброи. На местото каде што им беше кажано: „Не сте мој народ^[11].“, ќе бидат наречени: „Синови на живиот Бог^[12].“ ¹¹Тогаш повторно ќе се обединат народот од Јуда и народот од Израел, ќе си назначат еден водач, и ќе излезат од земјата, зашто голем е денот на Језреел.

Глава 2

¹Кажете им на вашите браќа: „Мој народ^[13]“ и на сестрите ваши: „Сакана^[14]“.

Израел казнет и обновен.

²’Прекорете ја вашата мајка, прекорете ја,

зашто таа не е моја жена

и Јас не сум нејзин маж.

Нека ги отстрани блудствата од лицето свое

и неверствата од меѓу градите,

³зашто ќе ја соблечам гола,

ќе ја направам како од мајка родена,

пустина ќе ја направам,

во сува земја ќе ја претворам

и ќе ја оставам да умре од жед.

⁴Децата нејзини нема да ги сакам,

зашто тие се деца на блуд.

⁵Ете, неверна беше нивната мајка,

срамно го направи нивното зачнување,

рече: ’Ќе одам по моите љубовници^[15],

оние што ми го даваат мојот леб и мојата вода,

мојата волна и мојот лен,

моето масло и моите пијалоци.'

⁶Затоа, гледајте, ќе ѝ го препречам патот со трнови грмушки,

ќе ја заградам со ѕид па нема да може да си ги најде патиштата.

⁷Ќе трча по своите љубовниците,

но нема да ги фати.

Ќе ги бара, но нема да ги најде.

Тогаш ќе каже: ’Ќе станам и ќе се вратам кај мојот прв маж,

зашто тогаш ми беше подобро од сега.'

⁸Таа не признаваше дека Јас ѝ го давав житото,

младото вино и маслото,

сребро и злато истурав врз неа,

а тие го употребија за Баал^[16].

⁹Затоа ќе се свртам и ќе си го земам моето жито кога ќе созрее

и младото вино кога ќе стаса;

ќе си ги земам волната и ленот

кои им беа давани за да си ја покријат голотијата.

¹⁰Така сега ќе ја покажам развратноста нејзина

пред очите на нејзините љубовници

и никој нема да ми ја заме од раце.

¹¹Ќе ги сопрам сите нејзини прослави^[17],

годишните славја^[18], Младите Месечини,

Саботите - сите нејзини празници.

¹²Ќе ги уништам лозата и смоквата нејзина

за кои вели: ’Тие ми се плата што ми ја дадоа моите љубовници.'

Ќе ги претворам во грмушки па дивите животни ќе ги брстат.

¹³Ќе ја казнам за деновите кога на Баалите им палеше темјан,

се китеше со прстени и накит и одеше по нејзините љубовници,

а Мене Ме заборави.“ - вели ГОСПОД.

¹⁴’Затоа Јас ќе ја намамам,

ќе ја одведам во пустината

и ќе му зборувам на нејзиното срце.

¹⁵Ќе ѝ ги вратам таму лозјата нејзини,

а долината Акор^[19] ќе ја претворам во врата на надеж.

Ќе ми возврати таму како во деновите на нејзината младост,

како во деновите кога дојде од Египетската земја.

¹⁶Во тој ден,“ - вели ГОСПОД - „ќе ме нарекувате Иши^[20],

и нема повеќе да ме нарекувате Баали^[21].

¹⁷Ќе ги отстранам имињата на Баалите од нејзината уста

и нивните имиња нема повеќе да се повикуваат.

¹⁸Во тој ден ќе склучам за нив завет со полските ѕверови,

со птиците небесни и со суштествата по земјата,

па лак, меч и битка ќе исфрлам од употреба во земјата

и ќе можат да одмараат во безбедност.

¹⁹Ќе те верам за Себе довека,

ќе те верам за Себе во праведност,

во правда, во љубов и милост.

²⁰Ќе те верам за Себе во верност

и ќе ти стане јасно Кој е ГОСПОД.

²¹Во тој ден ќе им возвратам,“ - вели ГОСПОД -

„ќе им возвратам на небесата, а тие, тие ќе ѝ возвратат на земјата,

²²и земјата ќе му возврати на житото и на младото вино

и на маслото и тие ќе му возвратат на Језреел^[22].

²³Ќе ја посадам за Себе во земјата

и ќе ја љубам Немила^[23],

и ќе му речам на Не-мој-народ^[24], ’ти си мој народ',

а тој ќе рече: ’Боже мој'.

Глава 3

Помирувањето на Хошеа со неговата жена.

¹И ми рече ГОСПОД: „Ајде сега оди, и повторно сакај ја жената која беше сакана од друг и беше блудница, како што ГОСПОД ги сака синовите на Израел, иако тие се свртуваат кон други богови и ги сакаат колачите од суво грозје^[25].“

²Па ја откупив за петнаесет сребреници^[26] и за еден хомер^[27] и еден летек јачмен. ³Тогаш ѝ реков: „Многу денови ќе мора да живееш со мене. Не смееш да блудствуваш и не смееш да бидеш со маж, а ни јас со тебе.“

⁴Оти многу денови ќе живеат синовите Израелеви без цар и без кнез, без жртва и без свети камења^[28], без ефод^[29] и идоли^[30]. ⁵Потоа ќе се вратат синовите на Израел и ќе го побараат ГОСПОД, нивниот Бог, и Давид, нивниот цар, и ќе дојдат во последните денови треперејќи кај ГОСПОД и кај неговите благослови.

Глава 4

Обвинение против Израел.

¹Слушнете го зборот ГОСПОДОВ синови на Израел, зашто обвинение има ГОСПОД против жителите на земјата:

„Ете, нема верност, нема љубов,

нема свесност за Бог во земјата.

²Клетви, лаги, убиства, кражби, блуд

- ги преминаа сите граници.

После секое крвопролевање^[31] следи ново крвопоролевање.

³Заради ова страда^[32] земјата

и гинат сите нејзини жители.

Умираат ѕверовите полски,

птиците небесни и рибите морски.

⁴Но нека не подига обвинение човек против човек,

зашто твојот народ е како оние што обвинуваат свештеник.

⁵Потклекнувате дење, потклекнува пророкот со вас ноќе,

затоа ќе ја уништам вашата мајка.

⁶Уништен е мојот народ, зашто му недостасува знаење.

Затоа што го отфрли знаењето

и Јас ќе те отфрлам, да не бидеш Мој свештеник.

Затоа што го занемари законот на својот Бог

и Јас ќе ги занемарам твоите деца.

⁷Колку повеќе се множеа

толку повеќе против Мене грешеа.

Славата нивна во срам ќе ја претворам.

⁸Тие се хранат од гревот на Мојот народ

и ненаситни се од неговата неправедност.

⁹И вака ќе биде: „Како луѓето, така и свештениците

ќе ги казнам за патиштата нивни,

ќе им платам според делата нивни.

¹⁰Ќе јадат, ама нема да се наситуваат,

ќе блудствуваат, ама нема да се множат,

зашто ГОСПОД го напуштија, за да им се препуштат на

¹¹блуд, старо и младо вино,

а тоа го одзема разумот.

¹²Мојот народ со дрвени кипови се советува,

дрвени столбови му даваат одговор,

ете, духот на блудствата го заведува

и неверни му се на својот Бог.

¹³По врвовите планински^[33] жртвуваат

и по ридовите палат жртви паленици.

Под даб, под топола и теребинт^[34],

зашто пријатна е нивната сенка.

Ете затоа вашите ќерки се свртеа кон блуд^[35],

снаите ваши кон прељуба.

¹⁴Нема да ги казнам ќерките ваши кога ќе блудствуваат,

ниту снаите ваши кога ќе вршат прељуба,

зашто и самите мажи со блудници спијат

и на храмски блудници^[36] им принесуваат жртви,

а народот е во незнаење и пропаѓа.

¹⁵Иако ти вршеше прељуба, О Израеле,

Јуда нека не биде виновен!

Не одете на Гилгал,

не качувајте се на Бет Авен^[37]

и не колнете се: „Жив е ГОСПОД.“

¹⁶Ете, Израел е тврдоглав како тврдоглава јуница.

Може ли тогаш ГОСПОД да ги пасе како јагнињата на ливада?

¹⁷Ефраим^[38], оној што се здружи со идоли^[39],

оставете го!

¹⁸Им заврши пијалокот,

па се предадоа на блуд и блудствуваат.

Го сакаат, о како го сакаат срамниот пат владетелите негови.

¹⁹Ќе ги збрише виорот со неговите крилја,

нивните жртвеници ќе им донесат срам.

Глава 5

Пресуда против Израел.

¹Слушнете го ова свештеници,

внимавај доме Израелев, начули ги ушите доме царски:

„Ете, против тебе е оваа пресуда:

’стапица бевте во Миспа^[40]

и мрежа распната во Тавор^[41].

²Бунтовниците длабоко забраздија во колеж

и сите нив Јас ќе ги казнам.

³Го знам Јас Ефраим^[42], Израел не е сокриен од Мене,

зашто сега кон блуд се сврте Ефраим,

Израел е расипан.

⁴Делата нивни не им допуштаат

да се вратат кон нивниот Бог,

ете духот на блудствата е во нивните срца

и ГОСПОД не го познаваат.

⁵Гордоста на Израел сведочи против самиот него,

а Израел, дури и Ефраим потклекнуваат во сопствениот грев,

а со нив потклекнува и Јуда.

⁶Со стоката своја и со стадата

одат да Го бараат ГОСПОД,

но нема да Го најдат, се повлече од нив.

⁷На ГОСПОД му се неверни, вонбрачни деца раѓаат.

Сега Младата Месечина^[43] ќе ги проголта и нив и нивните полиња.

⁸Затрубете труба во Гивеа^[44], рог во Рама^[45]!

Дигнете боен вик во Бет Авен!

Зад тебе сме Венијамине.

⁹Ефраим ќе биде уништен^[46] на денот на пресметката -

меѓу племињата Израелеви го објавувам она што е сигурно.

¹⁰Водачите на Јуда се како оние кои разместуваат^[47] камења меѓници,

врз нив како вода ќе го излеам Мојот гнев.

¹¹Потиснат е Ефраим, згазен со право,

зашто зафатен е само со идоли^[48].

¹²А Јас сум како молец за Ефраим,

како гнилеж за домот Јудин.

¹³Кога Ефраим ја виде својата болест и Јуда својата рана,

се сврте Ефраим кон Асирија^[49]

и побара помош од големиот цар.

Но тој не може да ве излекува,

не може да ги исцели вашите рани.

¹⁴Оти Јас ќе бидам како лав за Ефраим,

како лав голем за домот Јудин.

Јас, Јас нив ќе ги искинам на парчиња и ќе си заминам,

ќе ги одведам и ќе нема кој да ги спаси.

¹⁵А Јас ќе се вратам во Моето место

сѐ додека не си ја признаат вината и не Ме побараат.

Во бедата своја искрено ќе Ме побараат.“

Глава 6

Израел не се кае.

¹Дојдете да се вратиме кај ГОСПОД,

зашто Тој на парчиња нѐ раскина, но Тој и ќе нѐ излечи.

Тој нѐ рани, но ќе ни ги превие раните.

²После два дни ќе нѐ оживее,

на третиот ден повторно ќе нѐ крене,

за да живееме со Него.

³Да Го запознаеме, да бараме сите да Го запознаат ГОСПОД.

Како изгрејсонце ќе се појави,

ќе ни дојде како зимски дожд,

како пролетен дожд што ја натопува земјата.

⁴Што да ти правам Ефраиме, што да ти правам Јудо?

Твојата верност е како утринска магла,

како роса која рано исчезнува.

⁵Затоа на парчиња ги раскинав преку Моите пророци,

ги убив со зборовите од Мојата уста -

како молња блеснаа пресудите против нив.

⁶Оти за верност^[50] сум желен, а не за жртва,

за познавање на Бог, а не за жртви паленици.

⁷Но и тие, како и Адам^[51],

го прекршија заветот и ми беа неверни.

⁸Гилеад, град на злосторници,

извалкан со траги крвави.

⁹Разбојници во заседа го демнат човека,

банда свештеници убиваат на патот за Шехем,

срамни злосторства прават.

¹⁰Страшни нешта видов во домот на Израел.

На блуд се оддал Ефраим,

осквернет е Израел.

¹¹А и за тебе Јуда Тој одреди жетва.

Кога ќе го обновам богатството на мојот народ,

Глава 7

¹кога ќе го излечам Израел,

ќе се изнесе на виделина гревот на Ефраим и злосторствата на Самарија^[52].

Тие лажат, крадци по домовите влегуваат,

по улиците разбојници ограбуваат.

²Но не сфаќаат дека сето зло во нивните срца Јас го памтам.

Гревовите нивни ги преплавуваат и секогаш Ми се пред очи.

³Со својата злоба радост му причинуваат на царот,

со лагите свои (ги развеселуваат) кнезовите.

⁴Сите тие развратни луѓе се како печка разгорена од пекарот.

Тој престанува да ја разгорува од кога ќе го замеси тестото,

па сѐ додека тоа не се надигне.

⁵На денот на нашиот цар кнезовите се зажаруваат од топлината на виното,

а тој им подава рака на оние кои се подбиваат.

⁶Срцата им се како печка, приоѓаат со сплетки^[53].

Нивната страст тлее цела ноќ,

а наутро се разгорува како огнен пламен.

⁷Сите тие се врели како печка,

ги проголтуваат нивните владетели.

Сите нивни цареви паѓаат^[54]

и нема ниту еден кој Мене Ме повикува.

⁸Ефраим со народите се меша.

Ефраим е како рамна погача непревртена^[55].

⁹Туѓинци му ја цицаат^[56] силата,

а тој не сфаќа.

Главата со седи влакна му е прошарана,

а тој не забележува.

¹⁰Дрскоста на Израел сведочи против него,

но и покрај тоа тие не се враќаат кај ГОСПОД, нивниот Бог, ниту пак Го бараат.

¹¹Ефраим е како гулабица лесноумна и глупава.

Египет го повикуваат, кон Асирија се свртуваат!

¹²Кога ќе тргнат, ќе ја фрлам преку нив мрежата Моја,

како птица во воздухот ќе ги соборам,

ќе ги уловам кога ќе ги слушнам да се собираат.

¹³Тешко на нив зашто застранија од Мене!

Уништување за нив зашто се побунија против Мене!

Јас би ги избавил, но тие зборуваат лаги против Мене!

¹⁴Не повикуваат кон Мене од срце,

туку лелекаат врз нивните кревети.

Заради житото и младото вино се собираат и застрануваат од Мене.

¹⁵Јас ги обучив и им дадов сила на нивните раце,

а тие против Мене коваат зло.

¹⁶Не се свртуваат кон Севишниот^[57].

Тие се како лак во кој не може да се има доверба.

Од меч ќе паднат водачите нивни заради нивниот безобразен јазик.

Заради ова ќе се подбиваат со нив во земјата Египетска.

Глава 8

Израел ќе жнее виор.

¹Принесете ја трубата до уста!

Орел^[58] лета над домот ГОСПОДОВ,

зашто тие го прекршија Мојот завет

и против Мојот закон се побунија.

²Израел кон Мене вика: „Боже мој, Те познаваме!“

³Го отфрли Израел она што е добро,

сега непријателот ќе го прогонува.

⁴Си поставуваат^[59] цареви кои не се Мои луѓе,

избираат кнезови кои не ги одобрувам.

Со нивното сребро и злато прават идоли за да бидат уништени.

⁵Отфрли го телето^[60] Самарио!

Мојот гнев гори против нив!

До кога нема да бидат способни за чистота?

⁶Тие се од Израел, а телето занаетчија го направи

и тоа не е бог.

На парчиња ќе го здробам телето на Самарија.

⁷Ете ветер посеаја, виор ќе жнеат!

На стеблото клас нема да остане и брашно нема да даде.

Кога би и дало, туѓици ќе го изедат.

⁸Проголтан е Израел,

сега тие се меѓу народите безвредно нешто,

⁹оти тие се искачија во Асирија

како диво магаре кое талка препуштено само на себе.

Ефраим им се продаде^[61] на љубовниците.

¹⁰Но иако се продадоа меѓу народите,

сега Јас ќе ги приберам.

И ќе почнат да се исцрпуваат под угнетувањето на моќни цареви.

¹¹Иако многу жртвеници подигна Ефраим

за да принесува жртви за грев,

тие за него станаа жртвеници за грев.

¹²Им напишав многу нешта од Мојот закон -

како нешто туѓо ги сметаа.

¹³Ми принесуваат жртви, дарови за Мене,

месото го јадат, но ГОСПОД не е задоволен со нив.

Ќе си спомне сега за нивната лошотија

и ќе ги казни нивните гревови.

Тие во Египет ќе се вратат.

¹⁴Го заборави Израел својот Создател и изгради дворци,

Јуда соѕида многу градови утврдени.

Оган ќе испратам врз нивните градови

и ќе им ги проголтаат тврдините.

Глава 9

Казна за Израел.

¹Не радувај се Израеле,

не весели се како народите,

зашто ти Му беше неверен на својот Бог!

Платата блудничка^[62] ја сакаш на секое житно гумно.

²Гумното и винската преса нема да ги нахранат,

а младото вино ќе потфрли.

³Нема да останат во земјата ГОСПОДОВА.

Ефраим ќе се врати во Египет,

а во Асирија ќе јадат нечисто^[63].

⁴Нема да му полеваат на ГОСПОД вино,

ниту ќе Му бидат пријатни нивните жртви.

Како лебот на ожалостениот^[64] ќе Му бидат

и сите кои ќе ги јадат ќе бидат нечисти.

Ете, нивната храна ќе биде само за нив

и нема да влегува во храмот ГОСПОДОВ.

⁵Што ќе правите во деновите на вашите свечености,

на денот кога е празник ГОСПОДОВ?

⁶Дури и да го избегнат уништувањето,

Египет ќе ги собере, Мемфис^[65] ќе ги погреба.

Среброто, нивното богатство капината ќе им го преземе.

Трње ќе завладеат во нивните шатори.

⁷Нека знае Израел - идат денови за казна,

идат денови за пресметка!

За неразумен го сметате пророкот,

за луд вдахновениот човек,

заради многуте ваши гревови и големата омраза.

⁸На човекот кој го чува Ефраим,

кој е со мојот Бог,

на пророкот, примки му поставувате по сите негови патишта

како да е дива птица.

Раздор владее во домот Божји.

⁹Длабоко потонаа во расипаност како во деновите на Гивеа.

Ќе си спомне Тој за нивната лошотија

и ќе ги казни нивните гревови.

¹⁰Како грозје во пустина го најдов Израел,

како првите плодови на смоквата ги видов вашите татковци,

а тие отидоа кај Баал Пеор^[66]

и им се посветија на срамни нешта,

станаа исто толку одвратни како и она што го засакаа.

¹¹Како птица ќе одлета славата на Ефраим.

Нема да има ни раѓање,

ни бременост, ни зачнување.

¹²Дури и ако одгледаат деца, Јас ќе ги напуштам.

О, тешко ним кога Јас ќе им свртам грб.

¹³Ефраим е како Тир^[67],

на убаво место посаден,

но Ефраим децата свои на клање ќе ги води.

¹⁴Дај им ГОСПОДИ што ќе им дадеш,

дај им утроба јалова,

дојки пресушени.

¹⁵Заради сета нивна лошотија во Гилгал

Јас ги замразив.

Заради грешноста на нивните постапки

од Мојот дом ќе ги избркам.

Нема повеќе да ги сакам нивните водачи -

сите до еден бунтовници^[68].

¹⁶Пепелница го погоди коренот на Ефраим,

се исуши, плод веќе не дава.

Дури и да родат децат,

Јас ќе ги погубам нивните мили потомци.

¹⁷Ќе ги отфрли нив мојот Бог,

зашто тие не Му беа послушни,

па ќе станат скитници меѓу народите.

Глава 10

¹Лоза нашироко разлозена беше Израел.

Богат род роди^[69].

И колку повеќе плод му се раѓаше,

тој повеќе жртвеници градеше.

Колку повеќе неговата земја напредуваше,

тој повеќе ги засакуваше светите камења.

²Измамничко е срцето нивно

и сега вината мора да си ја сносат.

Ќе им ги разруши Тој жртвениците,

ќе им ги урне светите камења.

³Тогаш ќе речат: „Немаме цар^[70]

зашто не Го почитувавме ГОСПОД.

А цар и да имавме, што може тој да направи за нас?“

⁴Даваа ветувања, лажно се колнеа,

договори склучуваа,

а судските спорови се множеа како отровен плевел по ораница.

⁵За телето^[71] на Бет Авен^[72]

се плашеше народот на Самарија^[73].

Ете сега луѓето и идолските свештеници,

кои ѝ се радуваа на неговата велелепност,

тагуваат по него,

зашто одземено им е и однесено е во прогонство.

⁶Во Асирија ќе биде однесено

како данок за големиот цар.

Немилост врз Ефраим ќе падне,

а Израел ќе се засрами од неговите советници^[74].

⁷Ќе отпловат Самарија и нејзиниот цар

како сламка на водената површина.

⁸Уништени ќе бидат возвишенијата на злото^[75],

гревот на Израел.

Трн и чички ќе растат по нивните жртвеници.

Тогаш ќе им кажат на планините - прекријте нѐ,

и на ридовите - паднете врз нас.

⁹Уште од деновите на Гивеа грешеше Израеле,

а таму и си остана.

Не ги порази ли војна злосторниците од Гивеа?

¹⁰Кога ќе Ми се посака тогаш ќе ги казнам.

Ќе бидат собрани против нив народите,

за да ги оковаат во ланци за нивните двојни гревови.

¹¹А Ефраим е јуница^[76] добро обучена,

која сака да врши,

затоа ќе ѝ ставам јарем на нејзиниот гол врат.

Ќе го впрегнам Ефраим, Јуда ќе мора да ора,

Јаков ќе мора да брани^[77] за него.

¹²Посејте според правдата,

ожнејте ги плодовите на верната љубов^[78].

Разорајте ја неразораната земја,

зашто време е да се бара ГОСПОД,

сѐ додека Тој не дојде и не излее врз вас правда како дожд.

¹³Посеавте лошотија, зло ожнеавте.

Го јадеше плодот на измамата,

затоа што се потпираше на сопствената сила,

на твоите многубројни војници.

¹⁴Ќе се дигне боен вик против твојот народ

и сите твои тврдини ќе бидат разурнати,

како што Шалман^[79] го уништи Бет Арвел во денот на битката,

мајка со деца собори на земја.

¹⁵Еве ова ќе ве снајде Бет Ел^[80], заради вашата голема лошотија.

В зори, сосема ќе биде уништен царот на Израел.

Глава 11

Божјата љубов за Израел.

¹’Кога Израел беше дете го сакав

и од Египет го повикав Мојот Син^[81].

²Но колку повеќе ги повикував,

толку повеќе тие од Мене бегаа.

На Баали^[82] им принесуваа жртви,

на леани богови^[83] им палеа темјан.

³Ете Јас го научив Ефраим да оди,

за раце го држев,

но тие не сфатија дека Јас ги излекував.

⁴Ги водев со врските на љубовта како со оглавник за луѓе.

За нив бев како Оној Кој од вратот им го симнува јаремот.

Се приврзав кон нив и ги хранев.

⁵Нема ли пак во земјата Египетска да се вратат

и нема ли Асирија да владее со нив,

затоа што одбија да се покаат?

⁶Меч ќе блесне во нивните градови,

ќе ги уништи лостовите на нивните портите

и ќе им стави крај на нивните намери.

⁷Мојот народ решил да Ми врти грб.

Дури и ако повикаат кон Севишниот,

нема да им возврати.

⁸Како да се откажам од тебе Ефраиме?

Како да те предадам на друг Израеле?

Како да се однесувам кон вас како кон Адма^[84]?

Можам ли да ве направам како Севоим?

Се промени во Мене Моето срце.

Сето Мое сочувство се разбуди.

⁹Нема да ја спроведам мојата огнена лутина,

нема да го опустошам Ефраим,

зашто Јас сум Бог, а не човек,

Светиот^[85] среде тебе,

и нема да ти дојдам^[86] со гнев.

¹⁰ГОСПОД тие ќе Го следат,

а Тој како лав ќе рика.

Кога Тој ќе рикне,

ќе дојдат треперејќи децата од запад.

¹¹Ќе дојдат треперејќи

како птица од Египет,

како гулабица од земјата Асирска,

па ќе ги населам по нивните домови.“ - вели ГОСПОД.

Гревот на Израел.

¹²Ефраим со лага ме опколи,

со измама домот Израелев,

а Јуда е сѐ уште своеглава против Бог,

против верниот Светец.

Глава 12

¹Ефраим со ветер се храни.

Трча по источниот ветер^[87] по цел ден,

лага и насилство умножува.

Спогодба со Асирија склучи,

а на Египет му испрати масло.

²Ете ГОСПОД има обвинение против Јуда,

ќе го казни Јаков^[88],

според неговите патишта,

според неговите дела ќе му плати.

³Во утробата братот за пета го фати,

во својата мажественост со Бог се бореше.

⁴Се бореше^[89] со ангелот и го победи.

Плачеше и за милост го молеше.

Го најде во Бет Ел^[90]

и таму зборуваше со него.

⁵Ете ГОСПОД, Бог Семоќен,

Јахве^[91] е Неговото славно име.

⁶А ти врати се кај својот Бог!

Запазувај ги љубовта^[92] и правдата

и секогаш надевај се на својот Бог!

⁷Трговецот в рака држи нечесни мерки,

сака да поткраднува.

⁸Многу се фали Ефраим: „Богат сум, си најдов богатство.

И покрај сите мои богатства,

нема да се најде кај мене неправичност или грев.“

⁹Ете Јас, ГОСПОД, вашиот Бог

Кој од земјата Египетска ве избави^[93],

пак ќе ве направам да живеете во шатори како во празничните^[94] денови.

¹⁰Им зборував на пророците

и многу виденија им дадов,

преку пророците параболи ви кажував.

¹¹Зол е Гилеад.

Тие се сосема безвредни.

Во Гилгал волови жртвуваат,

а жртвениците им се како купишта камења^[95] по изорано поле.

¹²Јаков побегна во земјата Арамска^[96],

и служеше Израел за жена,

за жена чуваше овци.

¹³ГОСПОД преку пророк го избави Израел од Египет

и преку пророк се грижеше за него.

¹⁴Но Ефраим горко Го предизвикуваше на гнев,

и крвнината^[97] негова нема да се прости.

Заради презирот негов ГОСПОД ќе му плати.

Глава 13

Божјиот гнев против Израел.

¹Кога Ефраим зборуваше луѓето трепереа.

Прочуен^[98] беше тој во Израел,

но згреши славејќи го Баал и погина.

²А сега уште повеќе грешат,

си прават идол од сребро според својот ум, леани богови.

Сите тие се дела на занаетчија.

За нив се зборува дека луѓе^[99] жртвуваат и телето го бакнуваат.

³Затоа ќе бидат како утринска магла,

како роса рано што исчезнува,

како плева што се одвејува од гумното,

како чад што излегува од прозорец.

⁴Но Јас сум ГОСПОД, вашиот Бог,

Кој ве изведе од земјата Египетска^[100],

и нема да познавате друг бог освен Мене,

ќе немате друг Спасител освен Мене.

⁵Јас се грижев за вас во пустината,

во земјата на врели горештини.

⁶Кога ги нахранив се заситија.

Кога се заситија се возгордеа нивното срце,

затоа Ме заборавија.

⁷Затоа ќе им дојдам како лав,

како леопард крај патот ќе ги демнам.

⁸Ќе ги нападнам како мечка на која ѝ ги грабнале младенчињата.

Ќе ги распорам сѐ до срцето.

Ќе ги проголтам како лав.

Дивите животни на парчиња ќе ги дерат.

⁹Ќе те уништам Израеле,

зашто си против Мене, твојот Помошник.

¹⁰Каде е твојот цар да те спаси?

Каде се управителите на сите твои градови?

Каде се сите оние за кои велеше:

„Дај ни цар и кнезови!^[101]“?

¹¹Ти дадов цар во лутина

и ти го зедов во гнев.

¹²Добро се чува вината на Ефраим,

запишан е неговиот грев.

¹³Болки на родилка му дојдоа,

а тој е дете неразумно.

Кога времето му дојде,

не ја отвори утробата.

¹⁴Од власта на гробот^[102] ќе ги откупам,

од смртта ќе ги избавам.

Каде е сега смртниот помор?

Каде е гробу твојата уништувачка сила?

Сочувството ќе биде сокриено од моите очи,

¹⁵иако тој меѓу своите браќа напредува^[103],

ќе дувне од пустината источен ветер,

ветер од ГОСПОД,

ќе секне неговиот извор,

бунарот ќе пресуши.

Ќе ги ограби од амбарите сите негови богатства.

¹⁶Народот на Самарија^[104] мора да сноси вина,

затоа што се побунија против својот Бог.

Од меч ќе паднат,

малите меѓу нив ќе бидат смачкани на земја,

бремените жени ќе бидат распорени.

Глава 14

Покајание кое носи благослов.

¹Врати се Израеле кај ГОСПОД, твојот Бог!

Ете ти падна заради твојот грев.

²Најди зборови и врати се кај ГОСПОД!

Кажи Му: „Прости ни ги сега сите наши гревови

и прифати^[105] ги благонаклоно плодовите од нашите усни.

³Асирија не може да нѐ спаси,

а ние на боен коњ нема повторно да се искачиме

и никогаш повеќе нема да им кажеме

на делата на сопствените раце: ’богови наши',

зашто во Тебе сиракот наоѓа милост^[106].“

⁴’Ќе ја излекувам нивната своеглавост

и ќе ги сакам во слобода,

зашто се сврте Мојот гнев од нив.

⁵Ќе бидам роса за Израел

и тој ќе цвета како лилјан,

ќе ги пушти корените длабоко како (кедрите од) Либан.

⁶Ќе растат фиданките негови

и величественоста негова ќе биде како маслиново дрво,

а мирисот како (кедрите од) Либан.

⁷Ќе живеат повторно луѓето во сенка,

ќе класаат како жито,

ќе расте бујно како лоза од Либан славата негова.

⁸Ефраиме, што уште барате од идолите?

Јас ќе ви дадам одговор,

ќе се грижам за вас.

Јас сум како зелено борово дрво^[107].

Твојата плодност^[108] од Мене доаѓа.

⁹Кој е мудар ќе сфати,

кој е паметен ќе разбере.

Ете праведни се патиштата ГОСПОДОВИ

и праведните одат по нив,

а бунтовните потклекнуваат на нив.

Забелешки

1. Хошеа значи спасение.
2. Уззија владеел од 792 до 740, пр. Хр., Јотам од 750 до 732, Ахаз од 735 до 715, Езекија од 729 до 686. Владеењата на некои цареви се преклопуваат, на пример Езекија од 729 до 715 владеел заедно со Ахаз, а од 715 до 686 бил самостоен владетел. Во 701 година пр. Хр., после четиринаесет години самостојно владеење, Сенехериб го нападнал и почнал да ги презема неговите градови.
3. Јеровоам втори, владеел од 793 до 753 година пр. Хр.
4. Во 6 и 8 стих, кога се зборува за раѓањето на Ло Рухама и на вториот син, Ло Ами, не е употребен зборот му, што можеби укажува дека Хошеа не бил нивни татко.
5. Језреел значи рассејува, распрснува.
6. Јеровоам Втори бил од династијата на Јеху (841-814 пр. Хр.). Крајот на династијата на Јеху е со убиството на Зехарија во 753 година (2 Цар 15:8-10).
7. Израел воено е победен во 724 година, а Самарија останала уште две години под опсада (2 Цар 17:5-6)
8. Ло Рухама значи немила.
9. На двапати биле избавувани од Асирија во 722-721 и во 701 година пр. Хр (2 Цар 19:32-36).
10. Ло Ами значи не мој народ.
11. Ло Ами.
12. Бене Ел Хај.
13. Ами.
14. Рухама.
15. Канаанските божества, на кои им служеле, надевајќи се на поголема плодност на земјата. Служењето на тие божества вклучувало и рутуален блуд.
16. Канаански бог за кого се верувало дека управува со временските прилики и плодноста на посевите, луѓето и животните.
17. Во прогонството немало можност да се слават празниците.
18. Годишни славја, 2 Мој:14-17, 5 Мој 16:16. Млади Месечини, 2 Цар 4:23, Иса 1:13, Амос 8:5. Саботи, 2 Мој 20:8-11
19. Акор, близу до Јерихон, инаку значи мака. Како што се менува значењето на имињата на децата, така и Акор се менува од мака во врата на надежта.
20. Значи мој маж, мој сопруг.
21. Значи мој господар.
22. Језреел овде значи Господ сее, за разлика од 1:4, каде што значи Господ распрснува, рассејува.
23. Ло Рухама
24. Ло Ами
25. Колачи од суво грозје му се принесувале на Баал како благодарност за жетвата.
26. околу сто и седумдесет грама.
27. околу триста и триесет литри.
28. Свети камења, видете 5 Мој 16:22, 1 Цар 14:23, 2 Цар 17:10, Мих 3:13
29. Ефод - свештеничка горна наметка. Кај првосвештеникот била изработена богато, везена со злато и други скапи материјали.
30. Идоли, видете 1 Мој 31:30 и 1 Сам 19:13,16
31. Ова може да се однесува на убиствата меѓу луѓето, убиствата на царевите (по Јеровоам Втори, три цара владееле во исто време, 2 Цар 15:10-14), или пак на принесувањето човечки жртви.
32. или се суши.
33. Идолските жртвеници обично се наоѓале по планинските врвови и по ридовите.
34. Pistacia terebinthus, терпентиново дрво.
35. Паганските обреди вклучувале и ритуален блуд.
36. Службенички во паганските храмови, кои учествувале во ритуалниот блуд.
37. Бет Авен - дом на злото, иронично име за Бет Ел, Божји дом.
38. Израел, северното царство.
39. Златното теле и култот на Баал.
40. Миспа или во Гилеад, источно од Јордан или во Венјамин.
41. Тавор, планина на југоисточната граница на долината Језреел.
42. Израел, северното царство.
43. Млада месечина, време за празници, но во овој случај време за пресуда. Можеби значи дека само за еден месец пророштвото ќе се исполни.
44. Гивеа, околу три километри северно од Ерусалим
45. Рама, северно од Гивеа.
46. Некои сметаат дека ова пророштво се однесува на Арамејско - Израелската војна ( 2 Цар 16:5-9 ).
47. Јудејците освојувале Израелска територија.
48. Не е јасно што точно овој Еврејски збор значел.
49. Асириски записи кажуваат дека Израелските цареви Менахем и Хошеа ( 2 Цар:15:19-20; 17:3 ), му плаќале данок на Асирскиот цар Тиглафилесар Трети.
50. Еврејски хесед, што значи пријателство, верност, приврзаност.
51. Или сите луѓе.
52. Самарија, друго име за Израел, северното царство. Самарија била царски град, одбрана од Омри за главен град на Израел ( 1 Цар 16:24 )
53. Можеби се мисли на еден од превратите во царската палата (2 Цар 15:8-30).
54. За дваесет години се смениле четири цара, Зехарија и Шалум за само седум месеци (2 Цар 15:10-15).
55. Рамните погачи се печеле на вжештен камен и ако не се превртеле, биле препечени од едната, а сирови од другата страна (1 Цар 19:6), метафора за неразумната политика што Израел ја водел во однос на двате околни моќни царства, Египет и Асирија.
56. Даноците кои му ги плаќале на Тиглатфилесар (2 Цар 15:19-20,29) и на Египет економски ја уништиле земјата.
57. или: „Не се свртуваа нагоре...“
58. или мршојадец, се однесува на Асирија.
59. После Јеровоам Втори дури пет цара владеат со Израел во време од тринаесет години (2 Цар 15:8-30), од нив тројца доаѓаат на власт со насилство (Ос 7:7).
60. Златните телиња поставени од Јеровоам Први (930-909 пр. Хр.) во Бет Ел и Дан (1 Цар 12:28-33)
61. Израелските цареви Менахем (2 Цар 15:19) и Хошеа (2 Цар 17:2) плаќале данок на Асирија за да го штити.
62. Во време на жетва се преспивало на гумната за да се сочува житото. Не ретко доаѓале блудници и добивале дел од житото, плата за блуд (Рут 3:2-3).
63. Нечисто според законот.
64. Нечист како лебот во куќата во која има мртовец (4 Мој 19:14, 5 Мој 26:14, Јер 16:7).
65. Мемфис, главен град на северен Египет.
66. Баал Пеор, скратено од Бет Баал Пеор, што значи домот на богот на планината Пеор. Некаде се употребува и Бет Пеор (5 Мој 3:29, 4:3,46).
67. Тир, прочуен по богатството, безбедноста и убавата природа.
68. Водачи - бунтовници, игра со зборови, овие два збора во Еврејскиот јазик слично се изговараат.
69. Веројатно се мисли на напредокот во времето на владеењето на Јеровоам Втори (793-753 пр. Хр.).
70. Набрзо Асирија ќе ги покори и ќе постави свој намесник.
71. Самарија, престолнина на северното царство, Израел.
72. Бет Авен - дом на злото, иронично име за Бет Ел, Божји дом.
73. Златното теле, идолот што го постави Јеровоам во Бет Ел (1 Цар 12:32-33)
74. Неговите советници - дрвените идоли.
75. Места за пагански обреди и жртви (4:13-14).
76. Сѐ до тука Ефраим (Израел), се нарекува јуница која ја работи лесната работа, врши на гумното и јаде од овршеното. Но сега Бог и на Израел (тука наречен уште и Ефраим и Јаков) и на Јуда ќе им стави јарем и ќе ги натера да ја работат тешката работа, орањето и бранењето - приказ на заминувањето во Асирско и Вавилонско ропство.
77. Да брани - после орањето со брана да ги дроби крупните грутки земја.
78. Еврејски хесед, што значи пријателство, верност, привазаност (6:6).
79. Не се спомнати на друго место во Библијата и не се знае за кој настан се мисли.
80. Бет Ел - Божји дом
81. Не само потсетување на избавувањето од Египет, туку и пророштво за Исусовото повикување од Египет (Мат 2:15).
82. Еврејски Баалим, множина од Баал, значи господари, пагански богови.
83. Леани богови (5 Мој 7:25; 12:3).
84. Адма и Севоим, градови во рамницата (1 Мој 10:19; 14:2,8), уништени заедно со Содом и Гомора.
85. Светиот среде тебе (Иса 1:4, 6:1, 12:6).
86. или нема да дојдам против мојот град.
87. Бесплодна надворешна политика, невешто колебање кон која од двете велесили да се приклони.
88. Јаков значи: „грабна за петата“, односно измами.
89. Се бореше со ангелот (1 Мој 32:22-28).
90. Во времето на Осија Бет Ел било најважното царско светилиште во северното царство.
91. Јахве = ГОСПОД, што значи Вечниот, Живиот, Оној Кој навистина постои, за разлика од паганските богови кои се творба на човечката рака.
92. Еврејски хесед, што значи пријателство, верност, приврзаност.
93. или: Кој е со вас уште од Египет.
94. Празникот на Колибите, кога се ноќева во шатори во спомен на патувањето низ пустината.
95. Во Еврејскиот постои игра на зборови меѓу Гилгал и галлим, што значи купишта камења.
96. Северозападна Месопотамија (1 Мој 28:2,5).
97. Вината за крвта на невините жртви, Божјите пророци.
98. Ефраим станал моќно племе меѓу дванаесетте племиња на Израел (Суд8:1-3; 12:1-7; 1 Сам 1:1-4), од кого излегле истакнати водачи како Јошуа (Јошуа 24:30) и Јеровоам Први (1 Цар 11:26, 12:20).
99. или: оние што жртвуваат, телето го бакнуваат (2 Цар 17:17, 23:10, Езе 20:26, Мих 6:8).
100. или: Кој е со вас уште од Египет.
101. Во северното царство го одбрале за цар Јеровоам Први, наместо царевите од Давидовата лоза (1 Цар 12:26).
102. Евр. шеол.
103. Игра со зборови, Ефраим значи плоден, а изразот: ’тој ќе напредува', односно на Еврејски: ’јаефри', звучи слично и има ист корен со Ефраим.
104. Самарија, главен град на северното царство, овде се однесува на целото царство.
105. или: ’прифати ги плодовите од нашите усни, како да сме ти жртвувале волови.'
106. Евр. јерухам, игра со зборови со името на девојчето Лорухама.
107. Единствено место во Стариот Завет каде Бог е спореден со дрво.
108. Ефраим значи плоден.