Прво писмо од апостол Павле до Тимотеј

Второ писмо од апостол Павле до христијаните во Солун

Прво писмо од апостол Павле до Тимотеј Библија од [[]]

Второ писмо од апостол Павле до Тимотеј

Глава 1

Авторство и поздрави

¹Од Павле,
апостол на Исус Христос, назначен по заповед на Бог, нашиот Спасител, и на Христос, нашата надеж.

²До Тимотеј, кој заради заедничката вера ми е како син.
Ти посакувам Бог Таткото и нашиот Господ Исус Христос да ти бидат благонаклонети, да покажат милост спрема тебе и да ти дадат мир.

Предупредување против изопачените учења

³Кога заминував за Македонија, те замолив да останеш во Ефес и да предупредиш одредени луѓе таму да престанат да шират изопачени учења, ⁴да престанат да си го губат времето со митови и со бескрајни родослови. Со такви нешта само предизвикуваат расправии, а не водат до Божјиот план, кој може да се осознае само преку вера.

⁵Целта на нашето предупредување е тамошните христијани да научат да сакаат искрено и од сѐ срце, да имаат чиста совест и искрена вера. ⁶Некои учители застранија од ова и се свртеа кон празни мудрувања. ⁷Сакаат да бидат учители на Мојсеевиот Закон, а не го разбираат ниту она што го зборуваат, ниту пак она што го тврдат со толкава самоувереност!

Улогата на законите

⁸Ние знаеме дека, ако правилно се применуваат, законите се добри. ⁹Но го знаеме и тоа дека законите не постојат за да ги контролираат праведните луѓе, туку да ги одвраќаат престапниците, бунтовниците, безбожниците и грешниците. Тие постојат заради луѓе на кои ништо не им е свето, луѓе што сквернават сѐ што ќе стигнат, убијци што се во состојба да си ги убијат дури и сопствените родители! ¹⁰Законите се напишани заради блудните луѓе, заради полово изопачените, трговците со робови, лажговците и оние што не си ги почитуваат заклетвите. Тие постојат заради сите оние што му се противставуваат на правилното учење ¹¹што произлегува од величествената Радосна вест која ми ја довери нашиот прекрасен Бог.

Благодарност за Божјата милост

¹²Благодарен сум Му на нашиот Господ Исус Христос, Кој сметаше дека може да има доверба во мене и ми даде сила да ја вршам оваа работа. ¹³Јас зборував навредливи нешта за Него, безобѕирно ги прогонував Неговите следбеници, но Тој се смилува над мене, зашто знаеше дека тоа се случуваше пред да поверувам и не бев свесен што правам. ¹⁴Каква огромна благонаклоност покажа нашиот Господ спрема мене! Целосно ме исполни со вера и љубов каква што има Исус Христос.

¹⁵<Исус Христос дојде на овој свет за да ги спаси грешните.“ Оваа вистина сите треба да ја прифатиме со целосна доверба. Јас сум најголемиот грешник од сите! ¹⁶Но токму заради тоа Бог се смилува над мене и преку мојот пример покажа колку Исус Христос е трпелив со нас грешните. Така и други луѓе ќе сфатат дека и тие можат да поверуваат во Него и да добијат вечен живот. ¹⁷На вечниот Цар, бесмртен и невидлив, на единствениот Бог, да Му оддадеме слава и почит за вечни времиња! Амин.

¹⁸Тимотеј, сине мој, упатствата што ти ги давам се засновани врз пророштвата што претходно се дадени за тебе. Нека те поттикнуваат да се бориш како добар војник, ¹⁹да бидеш верен и да имаш чиста совест. Некои луѓе доживеаја бродолом во својата вера, бидејќи не си ја слушаа совеста. ²⁰Тоа им се случи на Именеј и на Александар. Тие луѓе му ги препуштив на Сатаната, за да се научат да не зборуваат навредливо за Бог.

Глава 2

Како треба да Му се служи на Бог

¹Како прво, ве поттикнувам да се молите за сите луѓе. Барајте од Бог да им помогне и да ги благослови, а потоа заблагодарувајте Му се за сите нив. ²Молете се за царевите и за сите што се на власт, за да имаме мирен и тивок живот, исполнет со побожност и достоинство. ³Ваквите молитви се добри и Бог, нашиот Спасител, ги прифаќа. ⁴Тој сака сите да се спасат и да ја сфатат вистината, а тоа е дека ⁵постои само еден Бог и постои само Еден што може да посредува меѓу Бог и луѓето: тоа е човекот Исус Христос. ⁶Тој го даде Својот живот за да се откупи слобода за секој човек. Бог му ја упати оваа порака на светот во вистинско време.

⁷Бог ме одбра да бидам проповедник и апостол на таа Радосна вест. Јас не лажам. Она што ви го зборувам е вистина. Бог ме испрати кај оние што не се Евреи, да ги учам за верата и вистината.

⁸Затоа, каде и да се собирате, од мажите барам да креваат чисти^[1] раце кон небото и да се молат ослободени од лутина и препирки.

⁹Од жените барам да изгледаат скромно. Да се облекуваат едноставно и пристојно. Да не привлекуваат внимание со дотерување на косата, скапи облеки или накит од злато и бисери. ¹⁰Жените што тврдат дека веруваат во Бог треба да привлекуваат внимание со добри дела. ¹¹Треба да бидат тивки и покорно да примаат поуки. ¹²Јас не дозволувам жените да ги учат мажите, или да им заповедаат. Треба да бидат тивки, ¹³зашто Бог прво го создаде Адам, а потоа Ева, ¹⁴а и не беше Адам тој што беше измамен, туку жената, која потоа направи грев. ¹⁵Сепак, жените, ако останат верни, ако ја зачуваат љубовта, ако бидат свети и скромни, ќе бидат спасени^[2] преку раѓање деца^[3].

Глава 3

Какви треба да бидат водачите и помошниците во црквите

¹Точно е дека кога некој сака да биде водач^[4] на црква, посакува многу возвишена работа. ²Затоа, за да биде човек водач на црква, мора да биде без пороци, да ѝ биде верен^[5] на својата сопруга, да биде воздржан, разумен, со добар углед, гостољубив и способен да поучува. ³Не смее да се опива, ниту да врши насилства. Треба да биде трпелив, да не е склон кон расправии и да не биде алчен за пари.

⁴Треба да биде добар домаќин, а неговите деца треба да го слушаат и да го почитуваат. ⁵Ако тој не умее да го води сопственото домаќинство, како тогаш ќе се грижи за Божјата црква!?

⁶Тој не смее да биде новообратен, за да не стане горделив и да ја направи истата грешка што ја направи и ѓаволот^[6]. ⁷Тој треба да ужива добар углед и кај луѓето што не ѝ припаѓаат на црквата. Во спротивно, тој може да падне во стапицата на ѓаволот и да се посрамоти.

⁸Истото важи и за ѓаконите^[7] во црквата. Тие мора да бидат сериозни и чесни луѓе, да не лажат, да не се опиваат и да не бидат алчни за пари. ⁹Мора да имаат чиста совест и цврсто да се држат до начелата^[8] на христијанската вера кои сега ни се откриени. ¹⁰Пред да бидат назначени за ѓакони, тие треба да се докажат како луѓе без пороци.

¹¹Исто така и нивните жени^[9] треба да бидат сериозни. Не треба да се занимаваат со озборување, не треба да бидат избувливи, туку треба да бидат верни во секој поглед.

¹²Секој ѓакон треба да ѝ биде верен на својата сопруга^[10], добро да си ги воспитува децата и добро да го води сопственото домаќинство. ¹³Тие што добро ги извршуваат ѓаконските должности во црквата треба да бидат наградени со почит и доверба како верни следбеници на Исус Христос.

Тајната на нашата вера

¹⁴Се надевам дека набрзо ќе те посетам, но сепак ти го пишувам ова ¹⁵за, ако се забавам, да знаеш како треба да се однесува секој што му припаѓа на Божјото семејство, а тоа е Црквата на Живиот Бог, столбот и темелот на вистината.

¹⁶Без сомнение, тајната на вистинската вера во Бог е величествена:

Христос дојде во човечко тело. 

Светиот Дух потврди дека Тој 

ја исполни Божјата волја. 

Ангели Го видоа. 

За Него им беше проповедано 

на народите. 

Луѓето поверуваа во Него. 

Тој славно се вознесе на небото.

Глава 4

Распознавање на лажните учители

¹Светиот Дух јасно ни кажува дека во подоцнежните^[11] времиња некои луѓе ќе отстапат од вистинската вера. Тие ќе бидат измамени од лажливи духови и ќе се поведат по демонски учења. ²Нивните учители се лицемери, лажливци чија совест е докрај затапена^[12].

³Ќе проповедаат дека не треба да се стапува во брак, ќе забрануваат да се јадат одредени видови храна. Храната е од Бог создадена и христијаните, оние што целосно ја знаат вистината, можат со благодарност да ја јадат. ⁴Сѐ што е создадено од Бог е добро. Ако се јаде со благодарност, ништо не е забрането. ⁵Божјиот збор и молитвата го прават чисто и свето.

Примерни христијански водачи

⁶Ако вака ги поучуваш другите христијани, добро ќе ја извршуваш службата што ти е доверена од Исус Христос. Со тоа ќе покажеш дека и самиот се храниш од пораката на верата и здравото учење што го следиш. ⁷Држи се настрана од непристојни и бабини прикаски! Вежбај се да бидеш вистински побожен. ⁸Од телесните вежби има одредена полза, но побожноста е многу покорисна. Таа ветува награда и за сегашниот и за идниот живот.

⁹Оваа порака е веродостојна и заслужува целосна доверба. ¹⁰Напорно работиме и се бориме^[13], бидејќи се надеваме на Живиот Бог, Кој е Спасител за сите луѓе, а особено за оние што веруваат.

¹¹На тоа треба да ги упатуваш и поучуваш луѓето. ¹²Не дозволувај никој да те потценува поради тоа што си млад. Со тоа што ќе го зборуваш, со твоето поведение, со твојата љубов, вера и чистота, биди им пример на сите христијани. ¹³Додека да дојдам кај вас, посвети се на читање на Светото писмо во црквата, на проповедање и поучување.

¹⁴Не запоставувај го духовниот дар што ти беше даден преку пророштво, со полагање раце од страна на советот на старешините^[14]. ¹⁵Извршувај ги овие должности, посвети им се целосно, нека се гледа дека напредуваш. ¹⁶Внимавај како живееш и како поучуваш! Истрај во праведната работа, за да се спасиш и себеси, и оние што те слушаат.

Глава 5

Примерен однос спрема луѓето во црквата

¹Спрема постари^[15] луѓе не покажувај грубост, туку обраќај им се како што би му се обратил на сопствениот татко. Спрема тие што се помлади од тебе однесувај се како да ти се браќа. ²Спрема постарите жени однесувај се како да ти се мајки, а спрема помладите, твојот однос треба да биде чист, како спрема сестри.

³Грижи се за оние вдовици за кои навистина нема кој друг да се грижи. ⁴Ако вдовицата има деца или внуци, тие нека се учат да се грижат за оние што им се семејство, исто како што родителите се грижеле за нив. Нека ја покажат својата побожност најпрво спрема своето семејство. Тоа е она што Бог го бара од нив.

⁵Вистинска вдовица е онаа што нема роднини, што верува во Бог, Му се моли дење и ноќе, и бара помош од Него. ⁶Онаа вдовица што живее само за задоволства, духовно е мртва уште додека е жива. ⁷Пренеси им ги овие упатства, за да не грешат.

⁸Христијаните што не се грижат за своите роднини, а посебно за членовите на сопственото семејство, ја омаловажуваат верата! Тие се полоши и од неверниците!

⁹Секоја вдовица за која ќе се грижи црквата треба да ги исполнува следниве услови: да има најмалку шеесет години, да му била верна на својот сопруг^[16], ¹⁰да се има докажано со правење добри дела, со одгледување деца, со гостољубивост спрема патници, со понизна услужливост^[17] спрема вистинските христијани, со тоа што им помагала на луѓето во невола и секогаш била посветена на правење добри дела.

¹¹Помлади вдовици не ставај на списокот. Ако телесните страсти ја надвладеат нивната посветеност спрема Христос, тие ќе посакаат повторно да се омажат. ¹²Така ќе го прекршат ветувањето што претходно го дале. ¹³Освен тоа, тие можат да станат мрзливи и да им стане навика да одат од куќа во куќа. Не само тоа, туку можат да почнат да озборуваат, да прават сплетки и да зборуваат работи што не им прилегаат.

¹⁴Затоа, мој совет е помладите вдовици повторно да се омажат, да раѓаат деца и да се грижат за сопствените семејства. Така противникот ќе нема повод да ги клевети. ¹⁵За жал, некои вдовици веќе скршнаа и му станаа следбенички на Сатаната.

¹⁶Ако некоја христијанка има роднини што се вдовици, нека им помага, а не да ги остава на товар на црквата, која треба да им помага на оние вдовици за кои нема кој да се грижи.

¹⁷Старешините на црквата што добро си ја вршат работата заслужуваат да добиваат двојно поголема плата, посебно ако проповедаат и поучуваат. ¹⁸Така вели и Светото писмо: „Не врзувајте му ја муцката на вол што врши жито^[18].“, и „Секој што работи, заслужува да добие и плата^[19].“

¹⁹Ако некој сака да обвини старешина во црквата мора да има најмалку двајца или тројца сведоци. Во спротивно, немој да го слушаш. ²⁰Оние што грешат, искарај ги јавно, па и другите да извлечат поука.

²¹Пред Бог, пред Исус Христос и пред светите ангели, најсериозно те задолжувам да се придржуваш до упатствата што ти ги дадов! Немој да правиш дискриминација и да бидеш пристрасен!

²²Не избрзувај да ракополагаш луѓе за Божја служба! Не соучествувај во туѓи гревови! Чувај се да останеш чист!

²³Не пиј веќе само вода. Пиј по малку и вино, заради твојот стомак и болестите што често те мачат.

²⁴Казната за гревовите на некои луѓе е очигледна, а кај други гревовите и казната ќе станат очигледни дури по извесно време. ²⁵Така е и со добрите дела. Некои се очигледни, но и оние што не се нема да останат скриени.

Глава 6

За робовите - христијани

¹Христијаните кои се затекнале како робови треба искрено да ги почитуваат своите господари. Во спротивно, ќе дадат повод да се зборува лошо за Бог и за нашето учење. ²Оние, пак, чии господари се христијани не треба поради тоа помалку да ги почитуваат. Напротив, треба да им служат најдобро што знаат и умеат, бидејќи со тоа му помагаат на својот брат по вера, што треба да го сакаат. Така треба да ги поучуваш и да ги советуваш.

Алчни вероучители. Опасности од алчноста за пари.

³Секој што поучува поинаку, му се противставува на здравото учење на нашиот Господ Исус Христос, кое е основа на побожноста. ⁴Таквите учители горделиво се самозалажуваат, а ништо не им е јасно. Имаат нездрава желба да се расправаат, за збор да се фаќаат, а од тоа произлегуваат завист, кавги, навреди, опасна недоверба ⁵и постојани расправии. Нивните умови се изопачени и тие не ја разбираат вистината. Мислат дека верата е средство за лично богатење.

⁶Да, верата е навистина големо богатство, бидејќи те учи да бидеш задоволен со тоа што го имаш. ⁷Со празни раце доаѓаме на овој свет и кога ќе го напуштиме ништо не можеме да понесеме со себе. ⁸Ако имаме храна и облека, треба да бидеме задоволни. ⁹Оние што сакаат да бидат богати паѓаат во сите можни искушенија и стапици. Стануваат робови на неразумни и опасни страсти што на крајот ќе ги доведат до питачки стап и целосна пропаст. ¹⁰Алчноста за пари е корен на сите зла. Некои луѓе се толку алчни по пари, што дури и од верата скршнаа и си нанесоа^[20] многубројни болки.

Упатства за Божјите луѓе

¹¹Тимотеј, ти си Божји човек, затоа бегај од тие зла! Труди се да бидеш праведен, побожен, верен, да ги сакаш луѓето, да бидеш трпелив и кроток. ¹²Бори се храбро за верата и држи се цврсто за неа, за да добиеш вечен живот. Токму за тоа Бог те одбра и ти веќе пред многу луѓе даде исклучително добро сведоштво! ¹³Пред Бог, Кој му дава живот на сѐ што постои, и пред Исус Христос, Кој даде добро сведоштво пред Понтиј Пилат, те задолжувам ¹⁴беспрекорно да се придржуваш до сите заповеди, та никој да не може да ти најде мана, сѐ до повторното доаѓање на нашиот Господ Исус Христос.



¹⁵Бог е нашиот единствен Владетел,

Цар на царевите и Господар на господарите. 

Во определеното време Тој 

пак ќе Го испрати Исус Христос кај нас.

¹⁶Само Бог е бесмртен.

Тој живее во светлина 

во која никој не може да Му пријде! 

Човечко око не Го видело, 

ниту може да Го види. 

Сета почит и власт 

Му припаѓаат Нему. Амин! 

¹⁷Предупреди ги богатите на овој свет да не ги обзема горделивост, ниту да се надеваат на своето богатство што лесно можат да го загубат! Кажи им да се потпрат на Бог, Кој обилно ни дарува сѐ што ни е потребно за да уживаме во животот. ¹⁸Советувај ги да прават добри дела, да помагаат, да бидат дарежливи, решени да го делат со другите луѓе она што го имаат. ¹⁹Така ќе постават солиден темел за својата иднина, ќе се стекнат со вистински живот.

²⁰Тимотеј, чувај го тоа што ти го доверил Бог! Не учествувај во непристојни и празни разговори, во расправи за она што лажно се нарекува „знаење^[21]“. ²¹Некои луѓе скршнаа од верата, поведувајќи се по такви работи.
Бог нека ви биде благонаклонет!

1. Буквално: ЃсветиЃ.
2. Некои преведувачи ова го толкуваат и вака: ЃСепак жените, ако останат ..., кога ќе се пораѓаат, нема да бидат во смртна опасност.
3. Буквално: Ѓпреку детераѓањетоЃ. Можно е да се мисли „преку Спасителот“, бидејќи Христос се роди како дете, преку жена.
4. Грчки: ЃепископонЃ што значи надзорник.
5. Буквално: Ѓда биде маж само на една женаЃ.
6. Или: Ѓда падне под иста осуда како и ѓаволотЃ, или: Ѓѓаволот ќе го искористи тоа и ќе го собориЃ.
7. Грчки: ЃдиаконосЃ, значи помошник.
8. Буквално: Ѓдо тајните на вератаЃ.
9. Или: Ѓжените - ѓакониЃ.
10. Буквално: Ѓда биде маж само на една женаЃ.
11. Буквално: Ѓво последните времињаЃ.
12. Буквално: Ѓовената, исушенаЃ.
13. Во некои ракописи: ЃстрадамеЃ.
14. Грчки: ЃпрезвитериЃ.
15. Или: Ѓцрковни старешиниЃ. Во оригиналот: ЃпрезвитериЃ.
16. Буквално: Ѓда била жена само на еден мажЃ.
17. Буквално: Ѓако им ги миела нозете на светииЃ.
18. 5 Мој. 25:4.
19. Лука 10:7.
20. Буквално: Ѓсе избоцкаа со многу тагиЃ.
21. Грчки: ЃгносеосЃ.