Второ писмо од апостол Павле до Тимотеј (вики-превод)

Прво писмо од апостол Павле до Тимотеј (вики-превод)

Второ писмо од апостол Павле до Тимотеј Библија (вики-превод) од н.п.

Писмо од апостол Павле до Тит (вики-превод)

Глава 1

Авторство и поздрави

¹Од Павле, апостол на Исус Христос, кој по Божја волја проповеда за животот што Бог го вети преку вера во Исус Христос.

²До Тимотеј, кој ми е како вистински син.
Ти посакувам Бог, Кој е наш Татко и Исус Христос, Кој е наш Господ, да ти бидат благонаклонети, да покажат милост спрема тебе и да ти дадат мир.

Поттик на верност

³Благодарен сум Му на Бог за тебе. Нему Му служам со чиста совест, онака како што Му служеле и моите предци. Постојано те спомнувам во моите молитви и деноноќно Му се молам на Бог за тебе. ⁴Се сеќавам како пророни солзи при нашата разделба и копнеам пак да те видам, за повторно да се исполнам со радост.

⁵Знам дека имаш искрена вера. Така поверува прво баба ти Лоида, потоа мајка ти Евника, а убеден сум дека и ти веруваш во Господ исто толку искрено. ⁶Затоа те потсетувам да го разгоруваш во себе Божјиот дар што го доби кога положив раце врз тебе. ⁷Божјиот Дух не создаде од нас плашливци. Напротив, ни даде сила, љубов и самодисциплина.

⁸Затоа, немој да се срамиш да им зборуваш на луѓето за нашиот Господ. Немој да се срамиш ни од мене, сега кога сум в затвор поради тоа што проповедам за Господ. Искористи ја силата што ти ја дава Бог и придружи ми се во ширењето на Радосната вест, дури и ако треба заради тоа да поминеш низ страдања.

⁹Бог нѐ спаси и нѐ одбра да живееме свет живот, не поради тоа што ние со нашите постапки тоа го заслужуваме, туку затоа што тоа беше Негов план уште пред почетокот на времето - да ни ја искаже Својата благонаклоност преку Исус Христос. ¹⁰Сега, со доаѓањето на нашиот Спасител Исус Христос, тоа ни стана јасно. Од една страна, Тој ја порази смртта, а од друга страна, преку Радосната вест, ни го покажа патот кон вечниот живот.

¹¹Бог ме постави за проповедник, апостол и учител^[1] на Радосната вест. ¹²Тоа е причината поради која сега страдам в затвор. Но не се срамам! Јас знам во Кого верувам и убеден сум дека Тој ќе ми го запази она што сум Му го доверил^[2], сѐ до Оној Ден^[3]. ¹³Придржувај се до здравото учење што го доби од мене, а верноста и љубовта на Исус Христос нека ти бидат пример. ¹⁴Со помош на Светиот Дух, Кој живее во нас, чувај го она што Бог ти го довери.

¹⁵Ти знаеш дека сите христијани што дојдоа овде од Азија^[4], вклучувајќи ги Фигел и Ермоген, ме напуштија. ¹⁶Господ нека го благослови домот на Онисифор. Тој често ме посетува и не се срами поради тоа што сум в затвор. ¹⁷Веднаш штом стигнал во Рим упорно ме барал додека не ме најде. ¹⁸Господ нека му биде посебно благонаклонет во Оној Ден^[5]. Вие добро знаете колку многу тој ми помагаше додека бев во Ефес.

Глава 2

Смислата на страдањата заради верата во Христос

¹Тимотеј, сине мој, Исус Христос ти е благонаклонет! Дозволи Му да те направи силен. ²Она што го слушаше од мене пред многубројни сведоци, пренеси им го на оние луѓе кои заслужуваат таква доверба, луѓе што се способни да поучуваат и други.

³Како добар војник на Исус Христос издржи го твојот дел од страдањата, како што и јас го издржувам мојот дел. ⁴Кога еден војник е на должност не треба да се плетка со цивилни работи. Само така ќе може да го исполни она што од него го бара неговиот претпоставен. ⁵Кога еден атлетичар се натпреварува, не може да победи, ако не се придржува до правилата. ⁶Земјоделецот што напорно работи треба прв да вкуси од плодовите на својот труд. ⁷Размисли за ова и Господ ќе ти помогне овие нешта целосно да ги разбереш!

⁸Постојано имај Го на ум Исус Христос! Тој му беше потомок на Давид и воскресна од мртвите. Тоа е Радосната вест што јас ја проповедам. ⁹Поради тоа што ја проповедам Радосната вест, сега сум в затвор, како да сум злосторник. Но Божјата порака не е окована! ¹⁰Готов сум сѐ да издржам, ако со тоа придонесам оние што Бог ги одбрал, да добијат спасение и вечна слава, бидејќи Му припаѓаат на Исус Христос.

¹¹Вистина е дека:

„Ако сме умреле со Христос, 

со Него и ќе живееме.

¹²Ако издржиме,

со Него ќе владееме. 

Ако се откажеме од Него 

и Тој ќе се откаже од нас.

¹³Ако не Му бидеме верни,

Тој сепак ќе остане верен, 

зашто Христос не може 

да се порекне Самиот Себе.“

Биди добар работник

¹⁴Потсетувај ги луѓето на овие работи. Сериозно предупредувај ги во Божјо^[6] име да не се фаќаат за збор и од тоа да прават расправии. Од такви расправии ништо добро не може да произлезе. Тие можат само да ги уништат оние што ги слушаат. ¹⁵Труди се да се докажеш пред Бог, како работник кој нема од што да се срами, зашто правилно ја проповеда вистината. ¹⁶Одбегнувај безбожни и бесмислени расправи. Тие само ги оддалечуваат луѓето од Бог. ¹⁷Таквите учења се како рак - рана^[7] што се шири по телото. Именеј и Филет ти се пример за тоа. ¹⁸Застранија од вистината. Тврдат дека мртвите веќе воскреснале. Тоа ја поткопа верата кај некои луѓе.

¹⁹Без оглед на тоа, темелот што Бог го има поставено е цврст. Врз него стои напишано: „Господ знае кои луѓе се Негови^[8]. Секој што се повикува на Господовото^[9] име треба да се откаже од секаков грев^[10].“

²⁰Во богатите куќи нема само садови од злато и сребро, туку има и дрвени и глинени садови. Некои се за свечена, а некои за секојдневна употреба. ²¹Така е и со луѓето. Ако човек се очисти, Бог ќе го издвои за посебни задачи и ќе може да го употреби за секаква добра работа.

²²Бегај од искушенија својствени за млади луѓе! Стреми се кон праведност, вера, љубов и мир, заедно со оние што со чисто срце Го повикуваат Господ.

²³Не учествувај во глупави и бесмислени расправи. Тие само доведуваат до кавги. ²⁴Човек што Му служи на Бог не треба да се кара, туку да биде љубезен спрема сите, да ги поучува, да биде трпелив, ²⁵кротко да ги поучува оние што ѝ се противставуваат на вистината. Можеби Бог ќе им помогне да се покаат и да ја сфатат вистината. ²⁶Тогаш ќе си дојдат на себеси и ќе се извлечат од стапицата во која ги има фатено ѓаволот и ги има натерано да ги извршуваат неговите наредби.

Глава 3

Опасностите во последните денови

¹Треба да знаеш дека во последните денови ќе настапат многу тешки времиња. ²Луѓето ќе станат себични, алчни за пари, самољубиви и горделиви. Ќе навредуваат, ќе бидат непослушни спрема родителите, ќе бидат неблагодарни и без светост. ³Ќе немаат љубов, ни желба да си простуваат; ќе се клеветат еден со друг, ќе немаат самоконтрола, ќе бидат свирепи и ќе му се противат на сѐ што е добро. ⁴Ќе станат предавници, безобѕирни и вообразени. Наместо да го сакаат Бог, на прво место ќе сакаат да уживаат во своите страсти. ⁵Навидум ќе изгледаат побожни, но тие ќе ја одбиваат силата што може да ги направи навистина побожни. Држете се понастрана од таквите луѓе!

⁶Има меѓу нив и такви што влегуваат по домовите и ги придобиваат^[11] оние жени што се робови на гревот и што се раководат од необуздани страсти. ⁷Таквите жени постојано се подготвени да слушнат нешто ново, а никако да ја сфатат вистината. ⁸Тие луѓе ѝ се противставуваат на вистината онака како што Јанис и Јамврис му се противставија на Мојсеј. Тоа се луѓе со изопачен ум, нивната вера е лажна. ⁹Нема далеку да стигнат! Набргу нивното безумие ќе им стане јасно на сите, исто како што се случи и со Јанис и Јамврис.

Упатства до Тимотеј

¹⁰Тимотеј, внимателно слушаше што те поучував и гледаше како живеев. Знаеш што сакам да постигнам и во што верувам. Виде колку сум трпелив и колку ги сакам луѓето. Виде колку можам да истраам. ¹¹Виде какви прогонства и страдања истрпев во градовите Антиохија, Иконија и Листра. Низ какви сѐ прогони поминав и од сите нив Господ ме избави! ¹²Сите што сакаат да живеат побожно и да бидат на страната на Исус Христос ќе бидат прогонувани, ¹³а злите луѓе и измамниците, ќе стануваат сѐ полоши и полоши. Ќе заведуваат и ќе бидат заведувани.

¹⁴Туку ти остани му верен на она што го научи и со непоколеблива вера го прифати, зашто знаеш кој те учеше. ¹⁵Уште од мал ги познаваш Светите писма, а тие можат да ти дадат мудрост за да го согледаш патот кон спасението, преку вера во Исус Христос. ¹⁶Целото^[12] Свето писмо е од Бога вдахновено. Сѐ што пишува во него може да ни користи за да се поучиме, да ни помогне да се поправиме и да ни покаже како праведно да живееме. ¹⁷Светото писмо совршено го подготвува секој Божји човек да умее да прави добри дела од секаков вид.

Глава 4

¹Кога Исус Христос ќе дојде да го воспостави Своето царство, Тој ќе им суди на сите - и на живите или на мртвите. Затоа, имајќи ги Бог и Исус Христос за сведоци, со заклетва те обврзувам ²да ја проповедаш Божјата порака! Прави го тоа ревносно, без оглед на тоа дали моментот е погоден или не. Исправај ги луѓето и укорувај ги за нивните гревови. Трпеливо поучувај ги и охрабрувај ги.

³Ќе дојде време кога луѓето нема да го слушаат правилното учење. Напротив, за да си најдат оправдување за своите грешни страсти, ќе си повикаат многубројни учители што ќе им го кажуваат она што сакаат да го слушнат. ⁴Ќе престанат да ја слушаат вистината и ќе се свртат кон бесмислени митови.

⁵Ти, меѓутоа, биди трезвен во секоја ситуација. Издржи ги неправдите. Како проповедник на Радосната вест, изврши ја својата задача докрај.

⁶На мојот живот му се гледа крајот. Дојде време да заминам кај Господ. ⁷Храбро се борев, ја завршив трката и останав верен. ⁸Затоа, за мене е веќе обезбеден венецот на праведноста што Господ ќе ми го даде. Тој суди праведно и во Оној Ден^[13] ќе ми даде венец, и мене, и на сите што со нетрпение го чекаат Неговото повторно доаѓање.

За некои лични работи

⁹Потруди се да дојдеш кај мене најбрзо што можеш. ¹⁰Димас толку многу ги сака световните работи, што ме напушти и замина за Солун. Криск замина за Галатија, а Тит за Далмација. ¹¹Само Лука остана со мене.
Доведи го и Марко. Тој ќе ми биде од голема полза во службата.

¹²Тихик го пратив во Ефес.

¹³Кога ќе дојдеш, донеси ми го и палтото што го оставив во Троада, кај Карп. Донеси ми ги и книгите, а особено пергаментните свитоци.

¹⁴Ковачот Александар ми нанесе многу зло, но Господ ќе му плати за неговите постапки. ¹⁵Чувај се од него! Многу се противи на она што го проповедаме.

¹⁶Кога првпат ме изведоа на суд, никој не дојде да ми биде поткрепа. Сите ме напуштија. Од мене, простено нека им е. ¹⁷Сепак, Господ беше со мене. Ми даде сила да ја проповедам Неговата порака во целата нејзина полнота, па сите народи што не Го познаваат Бог да можат да ја слушнат. Господ ме спаси од сигурната смрт што ме чекаше, ако ме фрлеа кај лавовите^[14]. ¹⁸Да, Господ ќе ме чува од секакво зло и безбедно ќе ме доведе во Своето Небесно царство. Слава нека Му е за вечни времиња! Амин!

Завршни поздрави

<бр Ѓ>
¹⁹Поздрави ги Приска и Акила, како и семејството на Онисифор.

²⁰Ераст остана во Коринт, а Трофим беше болен и остана во Милет.

²¹Потруди се да дојдеш пред зимата.
Те поздравуваат Евбул, Пуденс, Линус, Клаудија и сите други христијани.

²²Господ нека биде духовно со тебе^[15] и спрема сите вас нека биде благонаклонет.

1. Некои ракописи додаваат: Ѓучител за неевреитеЃ.
2. Преносно: Ѓќе ја оправда мојата довербаЃ.
3. и 18 Денот кога Христос повторно ќе се врати, или денот кога писателот ќе замине кај Господ.
4. Се мисли на западниот и југозападниот дел од Мала Азија.
5. Видете ја белешката за стих 12.
6. Во некои ракописи ЃГосподовото имеЃ или ЃХристовото имеЃ.
7. Грчки: ЃгангренаЃ.
8. Цитат од 4 Мојсеева 16:5.
9. Или: ЃСекој што се нарекува христијанинЃ.
10. Цитат од Исаија 52:11.
11. Буквално: Ѓги заробуваатЃ.
12. Или: Ѓ<Секое свето писмо...“. Или: „Секое од Светите писма...“
13. Видете ја забелешката на 1:12.
14. Буквално: Ѓод устата на лавотЃ.
15. Буквално: Ѓсо твојот духЃ.