Пеш по светот/ Мајка и син

Од Wikisource
Прејди на прегледникот Прејди на пребарувањето
Поздрав... Мајка и син

од Коле Неделковски
нема
Од збирката „Пеш по светот“

Кажи, о мајко, кажи ми
зашто си уста затвори,
дали те болка прободе,
ели ти срце скамене?

Дали па ја те наранив -
младоста што си оставив,
низ туѓи земји заодив
народни маки загледав?

Кажи ми, ајде продумај,
кажи ми, што да направам -
земја и свет ќе превртам
сал да ти душа оттушам.

Палати ли да издигнам
и слуги, ех да развртам,
за да си младост исплачат
и да си живот закопат?

А низ нив млада невеста
да цвети и да развива
и с песни, мајко, весели
снежни да крева постели.

Ели да тргам без гајле,
бајрак од смев да развеам
низ тија пусти меани
со мои мили другари?

Ајде, ај не трај, прозбори,
мајко, на ум ми помогни,
па макар смртта смрштена,
млад да ме од свет откине.

Лулка си глава покреваш,
дочу ли писок разнесеи
виде ли земја студена,
борци што стрвно прибра?

Ај сега, поглед заврти
надежда в срце поврати!
Ти гледа чедо, одгледа
борец за свидна слобода.


Поврзано[уреди]