Лели ти рекох, девојко

Лели ти рекох, девојко од македонските народни песни

свадбена македонска народна песна

Лели ти рекох, девојко:
не сади, вади цвеќиња,
крај потот има градина,
крај неа врвет сејмени
и лудо, младо сејменче;
од коња си се наведе,
од корен цвеќе искина.
Лошо го мома прок’лна:
— Капнала рока десница,
тој што искина цвеќето! —
На час му рока заболе,
мома отиде с понада,
понада што му однесе:
бостан кисело јаболко,
с росна роса росено,
с тихи ветер вејано,
с јасно сл’нце грејано,
по месечина кинато,
на бели зори крадено,
в десна пазува носено,
в зетоска риза држано.

Поврзано

• Македонски народни песни

Ова дело е во јавна сопственост во целиот свет бидејќи авторот е непознат/народно творештво.