Весели гости весел абер донесле

Весели гости весел абер донесле од македонските народни песни

Водичарска македонска народна песна

Домаќине, стомјанине,
ако спиеш, разбуди се,
ако пиеш, весели се!
Весели ти гости дошле,
одозгора, од планина,
весел абер ти донесле,
од твоето бело стадо:
сиви овци с’ изјагниле,
со јагнина калешати,
сите кози с’ искозиле,
со јарина брнушати;
кобилите с’ изжребиле,
со жребиња патошати.
Весели се, домаќине!

Поврзано

• Македонски народни песни

Ова дело е во јавна сопственост во целиот свет бидејќи авторот е непознат/народно творештво.